مصابيح السما التامنى وطشيش...حميد

الأحد 13 سبتمبر 2009, 9:26 pm

يا جاي مارق
من دخول الغيث
شرايين التراب
السّايفَة..
أوردة الوطن
قَشَرَه اليباب..
نَشَرَه العطش..
كُلَما سرت
قطرات درب الرحمة
في جوفو
ارتعش..
بال الشدر
حال العصافير
الخياله
مع الدغش
مشدوه
متل خاطِر طفل
من ضُل ضهر راكُوبة
فوق حافة حجر
واقع سَحر..
واقف
يعد نقط المطر
ويتمطّق إحساس السحاب
بين لهفة الطين
والشمش
لمّت وراء طَرَف الحُقاب
أخر رمش
باقِيله
في عِب الشفق
والليل ملقّيِله الطرف
طَرَف الغسق.
...
شفق المغيب..
قفا غيم بِهت
كان نفضة الريشة الأخيرة
حَمَاره
فوق لُوحة الوكت..
يا كركَدَايةَ الله
إترشق ناقع عصيره
من إيد ملاك
فوق المغارب
بي تِحِت.
كانت مراكيب
حين صلاة
والترعة قِدّامن
طَشِت
ولا المراكب
من بعيد
ودعات علي
النيل
والنخيل المتكِي
دار يقرا البَخِت..
قنّب يحِت...
قلّع زريزير
غفوتو
عضّ إنطلاقة
غنوتو
وقام منحفِت..
والكمبو
ينشاف
من مسافة
قطر بضاعة
العربجية الطيبين..
سبّابة
والمتسببين..
شعراء ومغنين الأنادي..
أنصاص لصوص..
حلب البلد..
عرب الجبال..
منسللين من لا تحت.
والريح يشيل للنيل
من هرج المغنّين
الدعايات
نشرة أخبار
الولايات..الوفيات
الملايات..العبايات
المرايات..التصاوير
التعابير
الحكايات النِكـــِت.
عشم البنيات
في الضراع
الضاع
وكت حرّ الكَفِت
زاغ الصراع ذات جمعة
قدّت من وطن
توب السبت؟!
نَقَد الحَمام
خُرجَ الوكِت
طارت لو نقطة لحظة
من مية ملح
في حلقو
مرّرت الهديل..
كَمَد الجرح..
جَبَد السكات...
لكنّو فات
وأَبي يتلفت؟
...
بال الطفل
يرقِل
علي ضهر الحمار
يجمع مصابيح
السما التامنة..
ويطش
ينكربَش الحلم
البَعَد
قرّب يوافينا..إبتعد..
لو مدّت إيد
كان إنجبد..
يا الدنيا..!
بي ريحة الدعاش
لو تنعرش....؟
أو تنفرش
تحت الفراشات
بالبَرَد؟
فوقَو الوعَد
صادق يمش.
لو يلقي راس
رسن الزمان
ديك لحظة
ما كانت تمش
شان يندهش
أو ينبرش
بين نجمة الملكوت
ونسمة رضية
من رب العرش
...
يا غادي منك
فوت كلام الشوق
من القلب
الخشم بابو البلد
لو خشّ هدهد
في رماد ما فيهو
يمرق قانقرد..
والقانقرد
بابُو الحمام
راجيهو
لمليم الطيور..
ضمة جناح..
صمّة عدد..
قادرات علي
صد الحِدَي
جاسرات علي
صقر النكد.
إيدين بِنيات الفريق
بتهدهد الطفل الرضيع
بتعدّي شيخ
دومة الحفير
تشلَخ لَبَق..
تسقي الخدير
بتعوس
وتفرك للملاح
بِتَوَرّقَ اللوبي
وتحش..
تمسك مراح
تَحَلِب..تخش
تغسل هموم ايامه
في طشت الحِلم
تنفض..تَشُرّ الشوق
هِدم
تنشل من البئر
أُم تلاتين باع
تعَتّل..
تفزعَ الطيّانة
لو ما تجدَع البّانة
بتجيه بيوت
تغزل خيوط
بتطرّز المنديل
تخيّت لي طواقي العيد
صَبُر..
بتتبب السجاج
مع الفجاج..تقوم
إيدين بنيات الفريق
بتحش تمر..
تخرت سبيط
بتعتق الدكّاي..
وتخبز للصفاح
بتكفي عيزومة
وضيوف..
بتغنّي قيدومة
وتطوف
بتهني..
بتودي وتجيب
بتحنّي..
بتدلّك حبيب
بتولّد الأمّات..
تربي علي الصلاح..
زي ماب تضمّد
للجراح
إيدين بنيات الفريق
إن داهم الحلاّل
خطر
قادرات علي
شيل السلاح.
,, .. ,,
يا..مناحته
وبلاّله
يا..رجع اللي راح
يا ود عيون..
فِرحَن..بكَن
تِرحَن يغطســِن
في الدموع..
الدنيا عامرابك تظل
وإن كان رحيلك
فرتَكَه
أو يا لسان نار الصراع
لهليبه بعدك
لو هكَع
مين شالّو شيلة
بلا اتكّأ؟
...
مع إنو صبرك..ما نفَد
برشمتَ
أو كبسَلتَ
كيف؟؟
سِعة الوجود
في ضيق لَحَد ؟
باغتنا ريح الفجعة
ليل
فَرنَب في جوفنا
مَرَابَنات الصبر
شات ســِعن الجَلَد
صادنا الذهول..
زي التكنّو
قٌبُل دا .. ما فارقنا زول
بعد الرسول؟؟؟
... ...
واللاّ التقول
أوّل قلوب
في الدنيا
يغشاها القدر
بعَدِن
تضيع منّو الدروب؟!

تِنطَمبَج الساحات
حريق
يدغي الطريق
المحتمِل
كلّ الفريق
سوقَر وراك
يا جرحنا ..
الكيف يندمل؟
ما بار وراك شهدَ الغُنا
ونَحَل الحناجر
ما هِمِل؟
صادر خلايا أبو الدَبُر
صاقر حناياه
نَمل..نمل
...
...
وين ماشي..
يا نبض الرحيق
سايب المشاعر
ريق دقيق
نهب المغنّين
التِفِل ؟
غنواتن
الورطانة
أو لوطانة
في الريد المَقَق
حُترُب صفَق..
في طين ذِبل
أوصاف علي جسد الحبيبة
بَهَق..بَهَق
تحت احتماله مَرَضرَضَة
زي لعبة ما استهوت طفل !!!!!!!
... ...
وين داجّي
يا قمر الهنا الكرّمنا
عند مغرب مَرَق
سايب لياليك
لي نجوم
واقفات وجوم
علي فَد رجِل؟!
وفرع الغُنا
الميّل هنا
علي مين وراكَ.......حيتّكل ؟
والشيل تِقِل ؟
.... ....
قَدر اليشيلو الشيلة
في
لكن ظروفن
هل تفي ؟
تحتاج جماعة من الرجال
الكنت ليها براك تقِلّ !
دارت قبيلة من الحبال
الكان يقيله فَرد حبل...
الخوف قلوبنا التشتهيك
تنشك في ذاته
وتنقفِل.؟!
من بعدما أتوحّدنا فيك
ننفك قبائل..وتنكتل
وينشعنفِن مُسار
بعد فتلَ الحبل.؟.
...
حَب يا خيالي الوين وصِل
دُر يا لساني وماك فَسـِل
أطهر وزيزيناً يعوم
في النيل
مع الصير منشغِل
ولا اليقوم يوم بعدِ يوم
يغسل دمومو عديل..
غَسـِل ؟
ولاّ الوطن ؟
قال ماب ينوم
إلاّ الفجُر..يا ليل..
يهِل
ماسك وضوهو من الغيوم
السالو سيل
ساعة محِل ؟؟
... ...
... ...
كيف الدبارة ؟
وما العمل ؟
لمّا القبيلة
تشيل سيوفه
السوق
تبيعه !
علي عجَل..!؟
تغشي الكناتين
العويش
عُقُب المغارات
الحشيش
تاخد بخور .. ودخان
ولفّافات سطَل!؟
... ...
ورَق المواثيق إنبهَل
كاويق جريح
طلوَح بُو ريح
...
كيمان مَقنبَرَة
للمديح
والطار مجلّد
من حشا الفي القبّة
عَصب الفي الضريح ؟
...
حلقات قمار
تحت النخل
والخيل مجهزة للرهان
اخر النهار
فوق السهل ؟
لمّا الجدل
يبقي الدجل ؟!
والأيدولوجيا
هي الملاججة
واللواجة بلا عمل !

اللخبطة
الخمج
البوليس كتّال كُتل ؟
ليش البلد ما تستباح
يوماتي
كلما الليل دخل .. ؟... ...
إيش معني
يا شوقنا الرحل
ما أتصدقت
زرقاء غناك !؟!
ما كان حصل
كل الحصل.
والبت نصيرة
سنة الدهب
بَنَت الدهب
بنيانه ما فات الرّكب!
حزنت علي التِقِي
والتِبِن
وين تِبني لِبني
أبى يتلقي..
والكيل كَرَب
ساعة الرجال
سكنوا التُرَب..؟
...
والدنيا موية وسط حريق
تصبح كُرَب
تتمســـّى ضيق
قامت نِصيرة تحِت تعب
بِرَت الفريق
.. ؛؛ ..
"يا اخواتي .. ستّات البيوت
ناولني قوت.. قبّال أموت ؟
دُور
والعيال ما فكّوا ريق
طَبَق الدَهب
بي
مِد دقيق ؟؟!
دهب الجبال .. صافي البريق
بي
مد دقيق,,..,, أن كان مريق
..؛؛..
يا اخواتي .. ستّات البيوت
أدّني قوت .. عربون أموت؟!"
... ,,, ...
مطفيّة نيران التكُول
رغم الدخان
والحلة زي المافي زول
رغم البُطان؟؟
"يا أخواتي..سِتّات البيوت
صافي البريق..بي مد دقيق..
أدّني قوت.........عربون أموت"
عين الشمس
زي التقول متشوشة
أو مرشوشة بي حمرة غضب
زبد الحَمار
زي رغبة المالح
بعد خجة غريق..!؟..
... ...
والليل دخل
كبت الفريق
قنعت نصيرة من البلد؟!
كشحت علي كوشة
الدهب
وجات صادّي بي نفس الطريق
"لا رحمة
غير الوت قبَل
" .. "
لمّت عياله علي عجل
اتشهدت
واستغفروا
وقفلت علي روحَه الجبل.
..".."
كانت نصيرة بتفتكر
جوف الجبال
أولابه من ..عيشة الةبال
أولابه من..من حرس الرجال
ساعة يصيب البال
خلَل
والحال مُو..يا.. ..
كم من نصيرة
بلا نصيرة
اتريحت ..؟!
وفضّل براك !!
رغم الفشل.
والإستياء.
من مسخرة
هادي الحياة
بي إيد تدهده
للأجل..
وبي إيد تهدهد في الجراح
بي إيدين تفتّح للدروب
في كبرياء
والسايقِة لابد من تصل.
ضُل النهار .. الليل..
مِي.................يا ؟...
تبرد غبينتك..ولوعَتك..
طول الأزل
...
ويا روعتك
لامن تجادل دمعتك
دائماً تكون فوق العيون
..مرحيبة..
بالداخل عليك من دنيتك
عبيت مصابيح الصباح
ببياض ضميرك
ونيّتك
بعرق جبينك
وبنيتك
وبالشمش...ماروق الرجال
وجّت جنائن غنيتك
... ...
ما كان رحيلك ..غير دليل
للجاي..ماسك سِكّتك
يا شَدو عصفورنا البسيط
كل الحلوق إتوكّتك
إن ماب تبيت فوق السبيط
طوّل مسافة ركّتك..؟
ما صمّتك مطراً غتيت
لا ريح لديح..يوم..
سكّتك.
((عذراُ..
إذا حال الوطن
بالجاتو ذات ليل بكّتك
سايقين بأيادينا الزمان
شادّين خيوطو
الفكّتك
يا بئر..تكلةّ الناس..عليه
وما قطّ..
بي شنو..دلو إنهتك؟؟))... ...
يا صاحنا
في الزمن الغلط
يا سابلو دمّك كالغيوم
لا صرّ وشـّك لا عبس
إيش يعني لَو سالن نُقط..؟!
من كل عابر نقطة
بس.
يصبح شرايين
الظلط
تبقي الشوارع أوردة
وجسد البلد..
عافية عريس
لافّ العتامير..قرمصيص
لأجمل عروس
النيل...رحط.
والكون صِحابك
وإنبسط
فاتحة صحابك
ولاّ موج..؟؟
...
دا برش فراشك
ولاّ شط ؟؟؟!
...
سيل الدموع الما انحبَس
في الواطة بيقوّم..
تَبَس..؟
شهّي المدائن تنتفض
ما تمتعض..
موكب زفافك للأرض
شهداء الوجود تتلقي ليك
محتفية بيك....
شوقه الربك
مركب شرط هوجة البحار
شايل خبار
الهاربين
كان البشارة
لكل شط.
عِلت إبتسامتك حين هبط
ما من جواز
غير راحة إيديك
لا من ربط عُملة
وشنط
نية رسول..
إنسان فقط.
ما بيناـــــــــ بيناتك ــــــــ ربَط
بي أسمى مبداء..
وأقوي خط
ما جانا عشقك من فراق
لا نحن غنيناك عبط
جرح الوطن
خطالنا خط
ختالنا قول
ما منو نط
...
والليلة
يا...موت....يا ....حياة.؟
خـــــــــــاتي البيختار...الوسط.
ويابلد فوق اللميلس
لابتهم
لاب تميد الارض تحتك
لامغنيك بتردم
ماد لك نغمو
اليكاجر
للبتاجر بالنضم
يشطب الشخمت مشاعرك
ويرسم الاحساس
رسم
فى الزمانات الكتم
غنوة تدخل....
زى نسيمة
زى شعاع قمرة
ونجيمة
لاخشم باب لاتدق...
لافى امضاء رقيب
غريب...
لاتراويس لاختم.!
غنوة من بق المغنى
وفى القلوب بالفال تبق
تحرق السقط
التدنى
وبى تانى...
واثقة
تفتح فى الدروب
المارقة منك وداخلة منى
المارقة فيك وداخلة فى
الداخلة فيك ومارقة منى
وشايلة حنى...ضريرة...
حق... سيرة...دلوكة
وتدق
وتنطلق من بق لبق
تنهرد دارات
تغنى
رابة حس درويش
مفرتك
صانة زى شيخى
التبنى
ومن بعد دا...ولا يهم

المغنى مع قضيتو
يقضوا ليلات القسم؟
كلما تنبح كلاب
كلما انكشح عذاب
كلما طفح سباب
كلما عانى الجسم
كلما غروهم سم
كلما كان المغنى
كما المعاتية يبتسم!!
على التجنى
كانو جنى
وسديد بصيرة
وملتزم.

.....

ويالمغنى
الماندم
يوجد غنوتو

وينعدم

خاتم لمغنيين الوفاء
سى ياختم...
سلم على الشهداء
وكفى
وانجم من بعد السلام
يآل...مصطفى
طابت عينيك
والحب عليك
يبراك وسم
يكسيك هدم...

ارقد...قفا
ويكفيك اسم
الشتلة طالت..
والسبيقة
بعد دا لاشنو
التنهدم؟

..........

قول للبلاد..
الطولحت عينيها
فى دمع السواد
قول الله فى
قوليها
ماغنى الاسف
تتاسفى؟
لاحض نمو على الحداد
تتكتفى؟
عد عودو وماودع شهيد
انقريفى
فى السكة...يوت,,,
فى شهيد جديد
لايام جداد
هيا انزفى
لما الشوارع تكتفى
وينهض جوادة المنكفى
وتتكيفى!
قول للعباد
الطلوحت عينيها
في دمع السواد
ذات مرّة...
ما خِبر السأم
لما البلاد
صاده الوخم
صار المضاد الما اتلخم
دغم النغم × حرفو
وإنفرطق لغم
ينسف مطاميس الألم
بي سن قلم
كل القواميس الوهم
جرَفه المداد
لمّا الأماسي
بِقَن رماد
خَرَم الزمان
بي غادي قاد
وإندقه في الخازوق
سهم.
...
دُودَر نويرات الفريق
قِربن
بعد كانن بعاد
كورك لنا..
وما كنا في
بعنا السيوف
في السوق
أخدنابه السطل!
هايصين كُتُر
والخيل حِفِي
كورك لنا..
(قبل المصابيح
تنطفي
وينزل سواد
إنفقدوا الخيل والعتاد
إتمعنوا الدرب
العديل
إتضحوا بالصبر
الجميل
زمن الخساسات
الخفي
إن زالف الشوق
في الرقاد
قدح المواعيد
بنكفِي
في الضلمة
برد الليل مخيف
قاسي إحتمالو مع التعب
والجوف خفيف
صعب إحتمالو علي الضعيف
فِطنَ النويرات
الرغيف
فِطن الرغيف
لِب الدفِي
فِطن الدفي
إحساس الصباح
فِطن الصباح
كل العصافير تحتفي
بي روعة الكون
والعباد..
فِطن العباد
جية البعاد
فِطن البعاد
الماهو في)
رجّع صداهو
أعاد..
وعاد
زي أيّ درويش
إندغم × نقرة النوبة
الأرض بين باطو
يا دوبك شتم
أو قوق حمامة
مولّفِي
فوق راس بيوت
سبلوقة دم
...
...
"إياكي تشربي
يا طيور في الترعة
موية الترعة
سم
إياكي تقربي
لي بذور
فوق القبور
تحتن لغم
إياكي تضهبي
والصقور
بيشموا شم"
...
...
قوقت حمامة
إلي الديار
بعد السلام
متقريفي
قوقت فجر
قوقت ضهر
قوقت عصر
بعد العشاتين
كيكَت
...
سفهوها قالوا
مخرّفِي؟؟
...
كورك وراها
وكنا في
صانين زهاجي
كما التراب
حين كل غيمة
مطرفِي..
علي قدر ما اتحزم
يلملم فينا
من نتش السموم
الدنيا تصحى مخرّفِي
يجي ريح
يسوق غيمو المعوّق
ويختفي.
...
غلبو التعَب
كوّع علي جرحو اليسار
وسكت..
سكت..
قيرة الكمنجات
إتكت فوقو
وبكت
أنشودة الفوت
الوفي
أغرودة أو زغرودة
الموت الحفِي.
...
...
فيا مَن تحيّر
في سرّو الغناء...
إذا الهاربين
الجُدد
خيّروك
يا تفوت
يا تخون البيوت
تكون من انا؟
...
...
إذا الغالبين
في أحُد
إجبروك يا تموت
يا تعضي السكوت
فكيف الغنا ؟
...
...
وكت ما الشفوت
بصوتك تسوط
تعلّق بكرتو
علي الميضنة
تحرّم عليك
مناجاة
ولوفك
ملاقاة
طيوفك
وراء المشجنة
تغمد
تشوفك
تتبّن
حروفك
قبُل توزنه
تقلبن كلامك
تعِدّ إحتلامك
بباكر زنا؟!
فنم لا تهم
لامن السلطنة
تكشر الألسنة
يسري قول الشعوب
من مسام دندنة
مش يسد الدروب
المطر
بالهبوب
والخبوب
والخنا
وماب تعوذ الخلوق
من طريق
ممكنة
مُش في هادي الدنا
من قشيش
الجبال
التطاهو النعال
باقي نال
الرجال × بعض
يفتنه .؟.
,,,
وبين فرقةَ النبال
والقَمِيري
الوبال
والحياة المحزنة
الجنات الجهال
والبنات أم حجال
ضو بيوت الحَلال
من هنا..ولي هِنا
،،،
فجَّوا فورة الغنا
البقيرة أم ضروع
نقَّعن دم ..دموع
شمموها الجنا
والشديرة أم فروع
ركَّعن في خشوع
شعبُّوها القنا
طيَّبوها التلال
من خبوب الكتلا
بي حبوب
السنا
...
سوُّوا قيرة
ومطيرة
أرووا شوق الرمال
غنُّوا..
"يا هودَنَا
لعبة قديمة
عندنا
كان شبعت
يا جنا
ما شبعت
قول لنا
بت العسكر ...
تمشي
وتسكر
بت النوبة
تغني طروبة
من الحنِّية
مع عرُّوبه
تقِلبَ الهثوبة
في الراكوبة
علي اللالوبة
تشُرْ
لي توبه
...
ترسِّي
الغربة
تنسِّي
التُرْبَة
مآسي
حروبه
...
تكسْرَ الحربَة
بعُود الحرْبة
تدُقَّ النُوبة"
ربُّوا يا سُودَنة
بغَّرُوا الطير..رجَع
والبلد كَعْ..كَرَع
ركَّ في الميضنة
دكَّ للطنطنة
المِن الميضنة
الهِي ما مئذنة
كانت الميضنة
الهِي ما مئذنة
ضاربة في نصنا
حقنة لي مصَّنا
مدخنة حربنا
مدمنة سبَّنا
وإحنا ما ذنبنا !
بي طريق ربنا
جينا لي
ها..البلد
وإنولد حبنا
ليها
لي شعبنا
والله عالم بنا
وعارف الميضنة
الهِي ما ميضنة
ساسه مما إنبني
ماها لي ربنا
ميضنة بشتنة
والرسول كجنة
ميضنة كشتنة
والله قد لجَّنا
...
من مياضن الدمار
الله هوي نجَّنا..
وأبني فينا الوقار
لي جنا الكم جنا..
إنت فارج الكروب
للبطولبو العنا..
يا مخارج الدروب
من متاه الضنا..
حكمتك في القلوب
بس ندور نتْبِنَا..
إنت ياك طِبَّنا
وياك خلاص قلْبَنا..
من دواس شعبنا
سَوْ رصاص حَرْبنا
فأس لقي وعبَّنا
بالصلاح رضّنا
لي فلاح أرْضَنا
نبني للميضنة
التبِر فرْضنا
التصون عرْضنا
وما تضُر بعْضنا "
...
...
...
إنها السودنة
منّها الهودنة
...
ويبقي يا حاكمين
كلمة العالمين
مافي من يلكنة
وحكمة الآدمين
مافي من يسجنة
ولاَّ ماب ننكتم
ننهزم..ننهزم
إلاَّ ماب ينحكم
بالضلال شعبنا
فنم لا تهم
كشكشة كوزنة
والبغُش الغبش
ماب يغش ربنا
حزب من كذب
ماب يقوِّم بناء
وبناء منخرب
ماب يعمِّر بنا
فهِدَّ الرديف
العليه حقَّنا
وأبن لك صريف
من عضاك أو قنا..
وطن قول وطن
وطن يا جنا
وطن من تِبن
ولاّ قمحة هَنا...
...
...
وطن
...
ثم من.؟
...
وطن
...
ثم من ؟.
...
وطن
...
لا ثمن
باعك الزنزنة
...
وطن
...
واحتمل
وطن
…
واحتلم برجع الحبيب
من متاه الضني
...
في ناساً عزاز
مشتهنَّك رزاز
في ناس الرزاز
مشتهيهن هِنا
يغيض الحراز
حين يفيض البحر
عشان يذدهر
طول فصول السنة
قوانين تجوز
حتي في الأزمنة
هو الضد يكون
سكون في الغضب
غضب في السكون
هو المستقيم
هو المستدير
هو اللولبي
هو المنحنى
هي الكائنات
...
في الطيور مسكنة
وتستخف بالصقور
والحِدَي إن دنا
بالصراخ بالضفور
بالجناح اليفور
عِند تفقَّع جنا
،،،
فَنِمّ..حين تهم
هِمّ وإدلهم
عليك الصدام
سرَّة المأمنة
عليك الكلام
الجديد
الحديد
عليك النشيد
يا شهيد الغناء
تموت
ماب تفوت
تموت او تفوت
الشفوت
العنا...
ويظل الوطن
سيِّد الامكنة
ريِّس الأزمنة...
...
وأروح يات بكان
ألاقيك..
معمِّر..
مقيل أمهاتنا
أماسي أبهاتنا
ونهار البطان
يصنُّوا الجنات
يغنوا البنات
بذات المعاشِم
يحاكوا الكمان
تصدِّق لقيتك
في شافع
في خلوة
صباحاتو حلوة
مدنقِّر في لوحو
ينقِّر..
مدندن..
بصوتو الملان
غناكَ المسخِّن
يبرِّد جروحو
ويدفِّي الكيان..
وكت تمرق آهة
تصنقِّع تراها
يصنقِّع تراها
يشوف الدخان
تجمِّع سحابة
تكوس
في الغلابة
وترابه
الزمان...
لقيتك في قهوة
ودا شئْ عادي
كان
بس الماهُو عادي
خلا..
..ويا بلادي
صحاري وبوادي
جروحو الحجارة
التقرِّب تحارب
قبُل ما تعادي
دّخِلْةَ المغارب
تبردب..
تقارب
كهارب..كهارب
ترازي..وترازي
صواقع ترجف
بروقاً..توقِّف
قلوب الروادي.
ورواديك معادي
غنا الإعتيادي
شريطك حدودي
حجارتك وسادي
مسجل صحاك
المنام الزيادي.
...
بس
الماهُو عادي
...
دا..
من وادي حلفا
ودا..
من كاجو كاجي
ودا..
من ريرة غادي
ودا..
من كردفان
ودا..
من كل حتَّة
عقاباتو شتَّى
وجميعن يغنُّوا
يغنوا
ويصنُّوا
ويحنُّوا
بذات الكيان
لذات الكيان
ناس ولا إنشاوفوا
غنوة يتعارفوا
فلان ود فلان
ود فلان..الفلاني...
قلنا سرَّك
تعدَّي
الزمان والمكان
هبشتك...
نقشتك
مغمِّد حدرتك
منو..؟
المِن شدرتك
طعم كم لسان؟؟
أظل فيك حائر
كما العش
في طائر
يا سِر الرحيق
كما البرتكان ؟
شنو اصلك
غمائم؟
حمائم؟
هديله؟
نسائم
جنان؟
طبول القبيلة
سيوفه وحصانهَ
اليقيف فوق قتيله
لغاية الأمان
محل نمشي
فينا
مهقد عديلة
وبشائر
تجينا
شنو أصْلَك
أذان؟
جرس من كنيسة
إذا رنَّ
عيسى
يصِن في الكهان ؟
...
ألُوص فيِّ
حافي
أكوس في اللي
مافي
أظل فيكَ مدرك
لخافي البيان
...
وتظًل نبع المياه
والضو
قمحنا..
كسانا..
عافي..
سكن.
وين ما نسكتك..
نسمَع
عصيفير الحكاوي
رطَن
متين ما نفقدك
نلقاك
تحانِن بالغناوي
وطن..
مع إنو حباكَ
ميتة الغربة
وإستكتر عليكَ
كفن؟
...
قدُر وطنك
مع الأوطان
إذا ما كان
سحايبو أبن
يجيبن قش
من الوديان
عشان تدِّي السعيِّة
لبن
قدُر وطنك ؟
..
إذا هلكان
قدِر ينقِذ
قرف دركان
قدِر يقسى
ويخيِّب ظن
حِبَيْبُو..
الطيِّب..
الأنسان
يطفِّر ريحو..
روح الفن
...
...
وطن..؟
لكنو..
ما هو لك
ولا الزول القبيل
بي خيرو
بات زولك..
وطن محتل
بشوف مختل
رؤى ووجدان
خيال مكسور
وشن جابرو
ينوم والجنّة
في خاطرو
صُرُف غلمان
بنيات حور
خمور وقصور
يشِب من تل
بخور تيمان
بلا رحمة
وبلا رحمن
يقع يابس
علي دابرو
يرجِّع شهوتو
الشيطان
إلي الدنيا
ويقوم مبتل ؟!؟.
وطن من هُولو
ما هولك
ولاك الهولو
من هُولك
فما معني الأرض
بالضبط..
أو بالربط..؟
شن قولك
وكت تكدح
تكد حولك..
تباصر الموية بالسرقة؟!
غرامة..ودردرة..وعلقة...؟؟!
ويصادر الوالي
محصولك ؟
يلز ضل المقيل
تعبك
ينصِّل منجلك
قصبك
يهز لك راسو
قندولك !!؟؟
ولادة التابى
ماب تابى!؟
تحت باطك
تجر الريح
بدل مسدار
وورتابة؟؟
...
وطن ما ليكَ
فيهو وطن
بحر لي جرفو
يتغابى
لو ما ترمي
فِطنُو..
حجر
كركجايي
دُرَّابة
لو ما هبَّ
ريح الشيم
وريح الشيمة
هبَّابة
تقول مرسوم
أو أنو الغيم
ملقِّي عليهو
رُقّابة ؟!؟
...
...
بحر يا أخيْ
خسارة..؟
أفَيّ ..؟
عوارضو الجَنْ
يحنْدِك فينا
بالمِي النَيْ
يملَّينا الشراب
ألجن !؟
نصاقر لامتين
الصيْ
والعالم صحاري
سَقَن
إشن عبّاكْ
وقالَّك غَنْْْ ْ ْ ؟
أو غبَّاك
وقالَّك عن ؟!؟
وطن خلوهو
للأقدار
فِتَنْ
ما خلُّوا فيهو
خدار
خلاف الطرْفي
طرفِ اغَنْ
وطن ما خلُّوا
فيهو وطن
معلَّق بين لهات
عربيهو
والزول الحويلو
رَطَن
ولكنك
تغنِّي وطن
بعد دا ،،،
وطن
بي دا ،،،
وطن
يي دا
وطن .؟.
لا كلَّت مزاميرك
ولا ضرب الربابة
وهِن
عشان تتفتح الابواب
تغنى حقيقه
مو هواب
تغنى صولب
تغنى وشن
فيا دخلت
هبيب الرحمة
يامرق الحبيب
اذن
تغنى طليق
كما الطالق
تغنى...تغنى
مااتيقن

تبشر فى التقانتو
بكن
يكون المدفع
الخاذوق
مكانو...
مكن
بدل ها الدم
من الامات
رضيعاتنا
اللبن مكن
ومن بعد
المناحه
الضيق
زغاريد الفرج
طقن
نقاقيرو اليسون....
دن...
دن...
دن
دن

تطمن فى المرق
وحيدو
لاخوفا عليك
لاحزن
........
........
تغنى من التعب
لامن كلاك دمن
ولا شكرا
رجيت
لا...من
فهل يعنى النهايه
الموت؟
وينبعزق غناك
سدن؟
ام ان الغيم
حينسابق
على الارض العزيزة
فدى؟؟

وطنا..حبيبنا
رغم البين
هى الاشواق
حنينا اليك زين
يازين
يظل دفاق
.......
ماحوجتنا...
ونديك
وغيمنا عليك
دوم ساساق
يلاقى البينا
بين واديك
اناقى غزيرة
ماها افراق
نحبك من طرف
من جم
برغم قطائع الاملاق
ماب تنذم..
علاقه دم
وفاء...
وتاريخ
على الاطلاق
.......
اذا ما الغربه
لمتنا
على ذات الخلق
واخلاق
وطن وين كان
فى ذمتنا
فكيف يبقى الزمن
فراق
...........
......
هى الاشواق
.........
.....
ومابين
السماء
والارض

مد اشواق
.....
.....
فما طال المطر
بيصب
طبيعى انو البحر...
ماراق

كما انو العكار من طين
كمان من طين
يجى الرواق

.....
.......
صحيح انو المطر
رائق
ولكن السحاب
قد ضاق
خبارو الريح
باشن سائق
وكت كبد التراب مشتاق

اذا ماالعشق
منسابق
ومنطابق
على الاعماق
كذلك
حضرة العشاق
مع غيبوبه
الاشواق
...........
يامسكون هيام
وقيام
مع ليل الحنين
الطاق
قسمتك!
من شتا الايام
تضوى
زى الوطن
ماضاق
وطن ساكت
وطن نضّام
وطن ما فيهو
أي كلام
وطن صابر
وطن علاّم
وطن آخِر
وطن قدّام
وطن ساهِل
ولاب ينحام
وطن ماهل
وطن قوّام
فرد واحد
عديد أقوام
وطن خالد
علي الايام
وطن ساكت
...
...
وطنّا وبس
في جوفنا إندس
ألف
ميم
لام
متين ينبت
يلم قدّام
أمل
...
...
وأحلام
...
رمز لي مجدو
صانو تمام
نحوت العزة
ماها أصنام
...
أريحيتو
...
ومسيحيتو
...
وسماحة إسلام
نقول للفوق
حويتو سلام
...
بطن بطراني
يا مريام
ويا مريوم
هي الأرحام
ويا أدروب
وتيّة
أمام
...
...
وطنا ونيتو
بيضاء
تمام
إذا إنهبشت هويتو
حرام
عندها بندقيتو
كلام...
وطن لا جوع..
وطن ىمن
تبس في الصحراء
لا ألغام
مصابيح السماء التامن
تغيب في الغابة
غيم وأنغام
دقر ياعين
وطنا الزين
ولاتنضر
لاننعاق
نظل فى حبلك
الواحد
حبيبين
مافى بينا فراق
........
وهيط...
شايلنا
شيله السيبى
سعن الباشى
والمعلاق
عشيوة الدراج
اواخر الليل
كهاربو....ضى النجم
بواغ
يسد لبق الاسى
الشايل بلد
فاتحلو غلبو بلاغ!؟
جروحو ...جروح
وياالنبى نوح
شقييان
والدهر لداغ
متينك..
ياغربه الجن
نسكت صنك
النقناق
وطن جيه الممطور للطين

نجيهو
وتصدق الاشواق
لازنزانه تترجانا
حى الشعب
يااشلاق
بلد واحضانه تتلقانا
...جنه...
الجدول الراقراق
.......
نطلق همبريب
الحن
على لفح النوى
الحراق
وفى وش الطراوة
دحين
منو اليطبل سماك
باطواق!؟
ياوطن النفوس
البكرة
اوادى الحشا
البراق
اذا ماالريح
جرح لليح
وصيفا حتحت الاوراق
حطبنا نصيح
اتبنى الساق
امان ياغينه
مو البتاق
.....
ياوطنا قريب للحى
وسرك البعيد
لحاق
حلو حلاوة
ماب تنضاق
ومرا كلوكلو
ان ضاق!؟
....
من كناك
ماخناك
لافينا الضلال
العاق
ويا حاسب سكاتنا
رضا
امانى بطونا
ماها غراق!؟
صدورنا
على البعادى
زقاق
ضهورنا الى المنادى
رقاق
رضينا بلا قرن
ننساق
وحين نحرن
جبل ياساق
........
الجرب يطير
ماب يمشى
لو حرت عليه
الاشواق
ومن قولب
لهيب الشمش
ماكوش
من الرقراق؟.
وطن لو رزة...
يكسر الرزة
....
وانت المالى عيونو
معزة
وين متراوح
سايب عزة
ودابها اشتغلت فيها
الغنيه
ودابو ضمير الدنيا
اهتز
وبدا فى القدح الكونى
يتبن شوفه يضوق للعالم
لذه
وين متراوح
وين ياطالى النيل
باب النيل
بحنين الوزة
.....
وعمرك كلو
تغنى عليها
وتترجاها
تعالى....تعالى
اول ماهى
بدت عينيها
نهمه غيمه
مشيت طوالى
...............
كوركنالك
كوركنالك
كوركنالك
يا
....الله
سبعه ايام فى سبعه ليالى
رجع الصوت الطالع
.....آه....
سرسار جدول
رادو العالى
كنا غلابة
وليل...وربابة
متلمين فوق قوز
ونغني
قلنا الصحراء
تشهِّل غابة
حلم قريِّب
ماهو تمني
تنسف - فجأة- الشوق- دبابة
وفينا غنانا
يصن فَدّ صَنِّي
اتنقطت
سحابة سحابة
وبدا يتلقط طير الجنِّة
نفس الريح الحرق الغابة
قطَّم فرحك
ليلة الحِنِّي؟!؟
...
رغم بهاظة وعظمة فقدك
إلا إنو الحياة ما وقفت
إلا أنو
في ناس بيغنوا
عشان تخضر الارض النشفت
ناس من بعدك
بعضها..بعضك
أرضها..أرضك
وناس لا عرفت ليك
لا سمعت بيك
وتكنو،،،غناك الليهُن
ماشي عليهُن
تتلافاهو الريح
وتفنَّوا......
ورا الأحلام
الجفت ورهفت
رهفت وخفت
خفت وطارت
طارت ورفت روحك
فوق الغنية
إتلفت بي بشكير الصبر
إندقت
وإنشتت..كواني..كواني
قلنا الله بيخون الخائن
لملمناك
والعين بتعاين
مدَّ النيل الوافي ضراعو
سوَّيناك باجور ..
وجنائن
شيدنابك دور ومدائن
حندكنابك حز الريح
حركنابك شوقنا الكامن
أو قلنابك..
ظل مطامن
أنو حيشرق فجر العالم
بي بني آدم
طيب..وآمن
ونفضل نطلِق نار الغنية
تالا الذمم الخاطي نظامن
تنسف ونجرف دبش الدنيا
وغش الفجر الكاذب
لامِن تبرّق
ويمرق شخب الباكر
وتضوي سماك
يا يومه التامن.
...
لما وطاك
...
ما خِبر الموت
برفع قدرك
للملكوت
مافي القِدْرَك
حتي الموت؟
ياتو القَدْرَك
وإنت اليوت
حيَر قدَرَك
هادي الصوت
حيَّر صوتك
هادي الروح
حيّر روحك
عشق الناس
الوين ما تروحك
تأبَي تفوت
من يتأمل فيك
يتجمل
من يتجمل
بيك
يتكمل
إنو الحق
مبسوط..مبسوط
يا الخلَّيت
الزمن الأطرق
زمن الموت
مضبوط
مظبوط
يا زول
يا حبيب
يا الأروع مافي الدنيا
الغيب
إتجمَّع بيك
إتوزع فيك
ومرقت في رقّة
شوارع
أزقة
ونفاجات
أبواب السر
بتودِّي تجيب
وتندِّي الأرض
تلاقي قلوب الناس
بي بعض
بلا ترتيب
إنتاوق فينا
ولا تثريب
علي خوفنا عليك
بتلاقي الحب
في عيون كدّاح
للشغلة تخُب
تنباخت بيك
مع كل صباح
يا زول يا كِيك
لو راح الحب
لو ضاع في القاع
الدنيا دي
راح تنقرقر جُب
قدّام عينيك...
مرّت قافلة
وكانت غافلة
يا يوسف في الدنيا القافلة
منو اليترجل ينزل ليك
أو يتروجل ينشل بيك
النجمة .. الحب
عوّد عينيك
في الضلمة تشوف
حفِّر بي إيديك
عتبات للجب
سمُّو .. أنسف جوف
صنّات الخوف
الشوف الرعب
يا ألزم فيك درّابة الصبر
أنا دربي عليك
جاييك
جاييك
... ...
فسراع .. فسراع
قلَّعت أشميق الشوق
ملتاع ..
أنتل وأفتل
فضَّل فد باع
والحبلِ يتم
كمل الأشميق
ما تحتي نِكِت
تنْقِت .. تنْقِت
فوق أرض حجر
لفِّيت .. لفِّيت
دُخْ بالسيسيق
يا جاو وسجر
يا نخلِ طوال
وأنا رجلي عضير
أنا نفسي قصير
من شرب القامشة
الشيشة ... البنقو
ومضغ القات
سف التمباك
لف الحبشاي في ورق قصتير
شم البنزين
الجن .. الطين
برد الأحراش
حر الزنازين
من يسقط وعاش
أضرُب بي إيديْ
قرَّبت أطير .
في الوضع الكير
تبَّنتَ عضاي
حين شفت الريح
ينتق في دلق
من لكدة جير
ما احترتَ كتير
الرب فزّاع
يا الفطْن القاع
شرَّطت هدومي
وتمَّ الباع
برطع .. برطاع
صدِّيت البير
أمسك .. يا ..
يوسف ... هاك أمسك
يوسف سامعني .. وماب يمسك
طمِّني عليك
لو ماك مارق
أمرق حسَّك
يوسف قول خير
أربط نصَّك ..
وأمسك في الحبلِ
وما تنتق ..
يا انقطع الحبلِ
ويا إنشقلَبفي الفيها معاك
لاحظ يا يوسف
إنِّي ضعيف
والحبلِ أضعف
من حيل موقف
سيل ريق الفِقَر العربية
قدّام اللقمة الغربية
خلِّيك حريف ..
بالذات أحرف
من عِرق الغضبة الشعبية
الهبَّة النار المطرية ...
كل إيد في جدار
شمشِم وإتحسس بأقدامك كل الأجحار
ما عِدم الجب قبل إعدامك
من عكن أحجار ..
الحفر الجب زول قدّامك
مو قبيلة فار ..؟
ولابدَّ أكيد ساعة تمَّ
لابدَّ طلع من دربٍ ما
تبِّن بي إيديك كوس الجحّار ...
لابُدْ .. لابُدْ
يوسف سامعني
ومابي يرُدْ
يا سيِّد ..
حرِّ الشمش شديد
وأنا بين حجرين
واقف ويحيد
نازف ... حفيان
رادف غلبين
وراجف ...عريان ...
سايف ...
عطشان ...
وآبار الأرض العربية
آباره جميعِن ..
قد قطَّن
والنهر جريح ..
وبعيد جداً
ده درب مقطوع ..
حداً .. حداً
بي فوقو قوافل ما عدّن
من صلبِ يسوع
الإنعرْبَن ..
حِرْدَن .. وصدَّنْ
من عهد محمد
ما جابن
جيهاتو الأربعة
ما ودَّن ..؟
من عهد صلاح الدين
وجمال ..
كل الينابيع طينن قطَّن
والغيم الزنجي دقس لندن
والمطر العربي مشى أمريكا
وبأمريكا .. إنجنس .. وإستوطن
القال يتمدين
جا مديَّن
والكان إنديَّن
جا مطيَّن ؟!
أأطلع عينيكَ توريكا

وين وصِل الحال الإنقطع
مع إنك يكفيك الفيكَ
أمريكا..
وأنصاص أمريكا
مارشات الناتو
مزازيكا
البوسنة
الهرسك
وصربيكَا
... ...
الله يرضاكَ ويرضيك
يا يوسف أخوي
أطلع .. نطلع
يا يوسف هوي
ما عاد يسمع
أنا حافي وساحت كرعيّا
فوق زفتِ الأرض العربية
عسمت كلماتي مع الرقبة
وداخت يا ساكت عينيّا
شاخت أيامي الشمسية
وباخت أحلامي القمرية
أطلع .. ياخي أطلع ..
ياخي أطلع
لا إنعلق يوسف في حبلي
لا إنفكَّ الصبرِ من إيديّا
يا
يوسف
يوسف
يا
يوسف
يؤسفني ما ردَّ عليّا .
.... ... ....
من نخلة على أختها متكيّة
أومت لي نسيمة العصرية
قيّلت إنصنّت وإنكربش
كدرومي الحالة بعينيّا
إنكرفس فيْ ضل النخلة
وإنكفت اللحظة المبكية
قمرية تراحم قمرية
وتحكيله بحرقة وراثية
قمرية من القمري الشاهِد
على خطو الميتة الدغرية
تحكيله وعينيها تناهد
عن كيف إنشرمت أغنيّة
وإنترمت أحرف من كلمة
إنسهكت روحه المقرية
حين سابه مغنّيها براها
في سفرة بعيدة وأبدية
كيف شمط الوتر الموّال
وإنفلت النم من صقرية
وإنشابط في لمينة الآهة
بي غم الفجعة الكونية
المرِق السانِد والشال
طقطقبو الدمع الهطّال
إنشقق حائط كان ساتر
وإترقرق سقف الآمال
الكان بيبشِّر بالفال
والبسمة عيون الأطفال
الكان بيوزِّع في العتمة
للضو على كل الحلاّل
الكان بيفرِّق في الزحمة
عن كيف تتلمه العمّال
في الكتمة يرطِّب بي كلمة
عرق المسهوك الشغّال
طوّالي يصبِّر في العالم
مو الصبر الفاوة الهقّال
الصبر المنو البني آدم
يعدل للزالف في الحال
ظل صابر قالت أميّة
دفنت لها كمِّين تربال
كم بِت شيّالة علانية
الريج جزّاها كما النال
قالت والخاطر جوّال
استغفر يا وتر الباكر
والدنيا قديمة يا موّال
قمرية تقاطع الأميّة
خلِّيهن يرتاحوا شوية
ما الفجع الواقع غلاّب
والدمع يريِّح .. يا أخيَّة
انفتق المرتِق بي صفحة
الزافرة الجات دافرة قويّة
ضلعاً ممنوعة من الفرحة
من حقَّها تبكي بحريَّة
البينا وبينو من الإلفة
ما بين الأرضِ وطورية
إحساس روّاسي لقى الضفَّة
عاذب في الجنَّة وحورية
ما حيلة العمر إن ما كفَّى
نفساً مطّامنة ومرضية
ترجع لي ربّها والمنفى
لي شعبها ماب ينسى قضية
الغُصّة تشرق القمرية
وتنعشرق في حلوق الخِلَّة
وين غائب .. سائب ليلاتك
يا شهر أحلامه بلا هلَّة
ولسَّع في مطاليق من غادي
بيجارطوا بنيات الحلِّة
في ربابيط تقطع في الوادي
للبطلع لأهلو ويندلَّى
عكازك مرمي وسيف صادي
وخيلك .. من غلبها .. لا حولة
لسّع في فوارق ..في طوابق
تتعلاَّ ..
ولازم تتعلاَّ
ما طال الرزق اليجي مارق
للناس تنصلبطُوا باسم الله
وين غائب سائب للعالم
يا تامن أيامو بلا طلَّة
ولسّع في جزائر مخجوجة
وفي خلائج لائجة على ملَّة
في عراق والرؤية المختلة
يا معاين في الغبن البائن
يطعن في أخيُّو وما يضلَّه
معنى القومية العربية
ما دلاَّ .. الضلَّ .. وما دلّه
1
أن تقلب للسلطة ...
بالدعم الأجنبي والخطّة
2
تنسلط في شعبك بالشرطة
المقصلة والبلطة ..
بالحمم الشعبية
3
تمرق من ورطة
عشان تدخل
بالأمّة وبلدك في ورطة
وبي دينه .. تدِينه ..
وماب تفرِق
4
أن تحرق بي نارك
قطِّية جارك ,, إيديَّة
5
وتنسلبط لي طينو ..
لي مويتو .. سماهو المهرية
تحت الشرعية الثورية
6
وكان أسمح .. لو تفتّح
نفّاج ما بينك وما بينو
عوّانك وعوّانو يشبوا
عاصرين على بعضِ
ويتربوا ..
من شطرٍ عربيٍ واحد
راضعين ..
في الأول ينحبوا
وفي الآخر .. راح يرموا الحيطة
وعلى بعضِ قلوبن ينكبَّوا
على صدر الأرض العربية
بالنور الأخضر ينعبُّوا
جنيات السلمِ مباديها
الموية البينا تعدِّيها
لا شرطة ...
لا نقطة ..
تلاقيها
كل إجراءاته الرسمية
أن تشرح ويفصح ما فيها
من عشق محبّة وحنِّية
لي كل الأرض العربية
بالشوق بتلوِّح أياديها
على نخلة قديمة على الشاطئ
في طيبة تتذكر أساميها
والحيطة التقفل ترميها
بي ريح الوجد القومية
عقبان الحيطة البعديها
والحيطة البعد البعديها
لي آخر الحيَط الوهمية
على خدر حبيبتي العربية
بتَّاً حبُّوبة ودغرية
لا رحطاً يقطعوا
همباتي ..
لا رحماً فضُّوا حرامية ..
7
وماب ننسى المتلبد
اليانكي
المشكي على الله
متسبب كايس لي علَّة
يدخل بها في الربع الخالي
ولا حاشا تحوشو
ولا كلاَّ ..
ولسّع في فلسطين محتلّة
وفي فلسطينات دار تُحتلّه
؟؟؟ ؟؟؟ ؟؟ ؟؟؟
وين غائب ..سائب
للعالم يا شايل همُّو بلا كلُّة
ولسّع في إفريقيا المحنانة
نشفانة سهوله المبتلّة
آسيا الكحيانة ..
وصبيانه
تنفرج على رمي الجلَّة !؟
لسّع في أوربا الغنيانة
فقرانة روح دار تنسلّه
لسّع في بعايض في العالم
بي دم الآدمي تنسلّى
ولسّع في هوائل
في بلدي
بي إسمي .. وإسمك
واسم الله ؟!؟؟
كيفنك يا وطني المافي
عوافي يا ارضي المحتلة
ولسّع ..
يا المِن خيتك بنسع
سنّارة الصبرِ ..
في جبّادة عشم الأيام
اللي هسّع ...
لا نتَّق كورا
ولا داير من بحر الحاصل
أفوت أقنع
لسّع دم فاير
في وطني
ولسِّع هم تائر
فيْ يلسع
لسّع حكاية عزة زاد
عن خيل رهاب متشرفه
مرق المغني يجيب مطر
لي نخلة روحه مشحتفة
هبش السحابة ..
أبت تصُب
صبّت عليهو العاصفة
فنّت من إيديهو الوتر
والغنوة خرّت نازفة
في حلقو ينعارض حجر
ساد الغناوي العازفة
وهج النجيمة الشايفة
بي ليلو ينطاير شرر
فوق راس نخلتو الناشفة
النار عديل .. النار قَبَل
حرق العطش ..
ما كان كفى
قِدر المغني ..
على دموعو يوقفة ..
قضَف الحجر والعاصفة ...
حين لمَّه في عضم المطر
بعد الصراعات والحَفا ..
النخلة كانت في الكُبُت ..
جمراية ترفِس واقِفة ..
خالفاله شتلة عمر شهر
محنة مغني ..
وعاصفة .
غلبت عليهو العاطفة
ضرّع على الشتلة أم سهر
وفي لُجَّة النار إختفى ..
داخل على حوش المطر
والشتلة بينو ملفلفة
الباقي من ساق نخلتو
فوق كتفو بىْ جمرو انكفَى
يا أمّة ..
فرسانك تموت
مغدورة ..
دائماً من قفا
يا أمّة ..
تقّابة .. وفا
وخانة مشاعر مرهفة
يا مدن شوارعه تستعيض ..
بي أغنياتو
عن النضال ..
ضد الظروف المجحفة
بعضاً على بعض الدروب
قاشرابو .. موضة وقندفة
لو تستعيد نفس أمنياتو
عَلى الطريق
مَافىِ الْعَوارضو توقفه
يا كمبوهات بتّ الحلال
بالطيبة والرحمة المحاننة
مترفة
يا الفارشين الأرصفة
يا الحلمهن حلم الطيور
عيشةً شريفة وأرغفة
في بلد حِنيْنة ... موالفة
يا المن أصابعين الوطن
حتى القيامة ...ولا الزمن ..
لا كُبَّة حامي بتنتفه
يا كلكن في العاصفة
دون عاطفة
مَن كان ..
بيسمع ...
مصطفى ..
صــــــــــنّه
ووهج صوتو انطفى
ومن كان بيسمع ..
ما اصطفى ..
حيْ ..
بي قضيتو ..
وبس ..
كفى .