منتدى واحة السودان

السلام عليكم ورحمة الله .. تفيد هذه الرسالة بانك غير مسجل لدينا ..نتشرف جدا بانضمامك الى الموقع بالضغط على زر التسجيل او التعريف بنفسك ان كنت من اعضاء المنتدى بالضغط على زر دخول .. او الضغط على زر اخفاء ان كنت تود تصفح الموقع فقط ... مرحبا بك معنا .

شاطر
اذهب الى الأسفل
avatar
مانديلا
عضو برونزى
عضو برونزى
عدد المساهمات : 250
الجنس : ذكر
نقاط : 531
السٌّمعَة : 2
تاريخ التسجيل : 10/09/2009
العمر : 31
الموقع : دولة ال53 الشقيقة
المزاج : عالي

النخلة...حميد

في الإثنين 14 سبتمبر 2009, 6:50 am
النخلة
محمد الحسن حسن سالم (حميد)

النخلة في الليل المهول .. وحيدا في عز الرياح
فارس يدارق في الرماح .. الجايا من كل إتجاه
رغم الجراح .. شح إلمي .. الزاد والسلاح
راكز يصول .. لا أنّ ولا حنى للجباه
لا خان بصيرتو الإنتباه
لا حتى قال ديل المغول
لا ختّ آه على عز قديم .. روح عجول
طول مداميك الصبر .. سدابا طاقات النباح
كل ما نزف من جوفو دم .. كل ما عزف لحنو الصباح
نجم الميامين الحمش ..
ينضارى شان تشرق شمش
تدي الحياة .. الناس .. الحقول .. الدابة .. والطير .. والبمش
لكنو ما بخبر أفول .. والأرض مخلاية التعب
مصلاية العشق الصعب .. ما بتستباح
زي نخلة .. في الليل المهول
كانت بتختبر الفصول
كانت بتمتحن الرياح .. كل ما تطول
والدنيا خوف عابر سبيل ..
يشوف عنف الرياح في النخلة .. واللا النخلة في عنف الرياح
في ليل مهول
طوالي راح يحلف يقول .. النخلة ما بترجى الصباح
والطيب الصابر سنين .. راجيها باكر .. حقو راح
لا فكّ دين ..
لا سدّ جوف .. رزقو المعلق في الصبيط .. مشهادو أصبح بين بين
النخلة ما بترجى الصباح .. لكن ضراعاً في البلد عارف عروق النخلة وين
خابر صمودا المن متين .. وسامع مناتقة الرياح ساكت صياح
لكن ضراعاً في البلد عارف عروق النخلة وين
ضامن ثبات ساقا الهطيط
وسامع مناتقة الرياح ساكت صياح
النخلة ما بتقدر تخون الأرض .. ما بتقدر تكون غير المراح
لي همبريب يغشى البيوت .. عند الصباح
نص النهار .. عند المغيب .. عز الرياح
النخلة تتجاسر تصون عش الطيور البينا .. تفرد للجناح
ما ليها غير تطرح تمور .. تملا الشواويل القفاف
ينتمّ زين .. ينحلّ دين .. يطلق ضهر زولاً بسيط ..
واقف على حد الكفاف
ومن ركة الرزق المتاح .. رزقو المعلق في الصبيط ..
ينزل كما الطير الخفاف .. يقدل نشيط ..
يخضرّ زي شتل الضفاف .. كل ما النشاف بدا في الصبيط
والنخلة لو عنف الرياح .. الصاعقة ..
أهوال الفصول .. آفة الذبول .. قدرت على ساقا الهطيط
تقع آ بتموت
تلقاها خشت في البيوت .. بي كل صراح
تبروقة .. سجاجة طهورة .. طبق من العرجون ..
ضنيب هبابة .. قفة وكسكسيكة .. حبل متين فتلوهو في ضل الدليب ..
نشلوبو من بير للشراب .. نسجوبو بنبر وعنقريب
تلقاها خشت في البيوت .. وبي كل صراح
جوبيل جريد يعرش سقف بيتاً جديد
أول دخلتو عريس سعيد
مبسوط يقرقر بانشراح
أو حتى واقوداً تقيدو السمحة في نار بارتياح
لي يوم عزيز ..
يطلع خبيز
نبيذ الليل صفاح
يطلع ملاح .. بروبو ناساتاً ضيوف
ولي زول وراهو شغل بعيد .. جابرا الظروف
يطلع قهيوتو وشاي صباح
وآخر المطاف ..
الموت بيلفح بسمة من توب الزفاف
الموت بيشرق نسمة في كل الصبا
النخلة ترباية العباد .. بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة .. شوف كيفن بتتحدى الرياح
تعبر على مر الحياة وتنمطق الموت بي جلد
من بعدما ملت البلد .. شتلاً معمر بالألوف
وشايل مخلف بارتياح
طول المصير .. النخلة حوتة الصحرا .. نوارة الجروف
تلقاها في أجمل وشاح
بي جراحا رجّتنا الصباح .. يا القلتو ما بترجى الصباح
النخلة تحت الأرض سر .. والنخلة فوق نخلة نصاح
والدنيا أوسع ما تكون .. والجو براح
وكل الرياح فوقا بتمر .. يكفيها دا .. ويكفيها صاح
ما استسلمت لي ريح غريب .. وكل الرياح فوقا بتمر ..
والنخلة ما بتخبر خلاف ريح اللقاح
والهمبريب وريح الصلاح
يا معوض الليل بالصباح
يا معود النار اللهيب .. روض نخلنا على الرياح
وفي لجة البحر الغريب .. أدي الرواويس الصلاح
يكفينا دا .. ويكفيها صاح
الرجوع الى أعلى الصفحة
صلاحيات هذا المنتدى:
لاتستطيع الرد على المواضيع في هذا المنتدى