خطابات ست الدار والزين ود حامد

الأحد 13 سبتمبر 2009, 9:44 pm

ست الدار بت احمد تكتب
ليك يا الزين ود حامد شوقنا
أما بعد
المبعوتة المنك وصلت
ورح فكيت الطلب الفوقنا
باقي الدين يا الزين خلصتو
قدر الباقي مصروف راشد والتومات
والجايات من جاي لاجاي
زي ما قت لك قبال دا
شهر اتنين حنطهر راشد
شهر اتنين المدرسة تجز
الله يبعد العارضة تجينا
راشد حالف ما يطهر
الا ابوه وعمتو تحضر
والا يحيبو الغنايين
عشان الشوق بت سرنا ترقص
قتلو نجيب المداحين
طنطن انا جاي من الحج
وعارف راشد لما يطنطن
كل الدنيا الفوقي تطنطن
غايتو بشر ... بس ربو يهون
ما كلمتك بالتومات
أول البارح جني يرطنن
قالن نحن الخواجات
بسم الله .... مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدوا يقلبو في ايديهن
عدمانين من أسم حكيم
واللا خبيراً بالمشروع
علماء آثار .... فضلت فيها آثار
ما خموها الجونا قبلكم ... شن خلولنا بلا حجار
الله يصرف الخواجات
بينات جعفر والمحجوب ... والمحجوب والخواجات
طقت حجي ... العمدة طفاها
باقي الناس الجات للفرجي ...
قنبو قيلو شبعو لحوم ... والخواجة يصور ساكت
سته خرفن وتيس ما كفن
سته خرفن في فد يوم
المعدوم أشكال والوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
سته خرفن وتيس إنصفن
سته خرفن في فد يوم
جات من صالح بت كلتوم
تسكت تخبز طول اليوم
لامن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
مافي غنوة ما غناها
مافي مدحتنا ماسواها
حمارو صبح لحق أمات طه
سب الدين والامريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ...
إنو في ناس لاعبين بالدين
وناس لاعبابا الامريكان
الله يصرف الامريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
مارقوك سووك باشكاتب؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحن نصاحاً إلا القراص والتجار والحاصل البحصل كل صباح
شتلاتك قبضن
الحملان كبرن بالحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت أم زين جابت لها بت
ستة أولاد حتين البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بالحيل آ الزين
راشد كرر ... شهر اتنين كان ما جيت انا ما بطهر
الله يبعد العارضة تعال
كان فد يوم يدوك تعال
كان بالخصم ان شاء لله تعال
وما تتوصى ... وداعة الله
أوعى البشغل والعربات والحيكومة السمها فاير
أم أولادك ست الدار بت احمد جابر
الخطاب الثاني
ست الدار بت احمد كيفك
جاني جوابك مفتوح شارع
جاني جوابك وانا بتصور في ناس راشد والتومات
في الشتلات والحالة عموم
ناس حلتنا التحت ... الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت ... يا ست الدار
أيوة بكيت ... يا ست الدار
لما قريت علماء آثار
علماء أيه يا بت الناس
سواح أيه ... ما عندك راس
ست الدار تتوهدبي ليه
وديل جماعة السي أي أيه
تعرفي أيه السي أي أيه
امريكان في كل مكان
ديل مالين الدنيا ملي
ديل قالين الخلق قلي
باسم الدين والامريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطون والخرطوم
انا مأزوم ... مأزوم ... مأزوم
يا خرطوم وينك وينك
يا خرطوم شن شب وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
انا مأزوم ... مأزوم ... مأزوم
يا خرطوم ... أوه خرطوم ... أوه واشنطن
طن ... طن لفتك فجراً يقطع رحطك
ست الدار سامعاني يا اخيتي ومرتي وأمي و أم الكل
انا بندهلك من شارع الله ... فوقي هجير والتحتي بقل
سبي معاي الشردو راجلك ... والحرموني شوية الضل
سبي الحالة العالة علينا ... حتى احكيلك بالتفصيل
حاصل الحاصل يا بت احمد
جاني وفد في المصنع زاير ... وكان الوفد دا امريكاني
لف وفات اليوم التاني
جانا مدير المصنع فاير
وشو حمار العدة العاير
نقفل مصنع فيهو خساير
وقالو يخفضو ميتين عامل
ميتين عامل في فد مرة
ميتين عامل ... ميتين عامل
يبقو هوامل ... يبقو هوامل ؟
مايهموش ... الهم المصنع
تف قرارو وفات في حالو
مسئولين ونقابيين مافي العارض واللا اترجى
العمال من سمعوا احتجو ... سيرو موكب صامد صامت
اتضامنا معاهم سرنا ...
أب عرام دور عربيتو ... العربية للامريكية
زنقح خلا الموكب ثابت
احتجينا مع الاحتجو
اتكلمنا كلام موضوعي
قلنا لمصنع حق الدولة ... والعمال اصحاب الحق
هي اللي تقرر والتتولى
هي بالبتحدد سير المصنع
ايد العامل هي القاع تنتج
ما المكنات الامريكية
زيت العامل ياهو البطلع ... مو المكنات الامريكية
ودرن الايدي العمالية
انضف من لسنات الفجرة
ودين الدقن الشيطانية
ومن كرفته البنك الدولي ... وكل وجوه الراسمالية
وأشرف من ...
داك الحين المصنع هاج
وجات عربات اللات بوليس ... فضو العالم بالكرباج
والبمبان الامريكاني
شرقت شمس اليوم التاني
كنا حداشر ونوباوية
متهمننا بالتخريب والتحريض وال ... وال... والشيوعية
البوليس صاقع شيوعية
وفاكر نفسو بنبذ فينا
هي آ بوليس امك مسكينة
البوليس عمدني شيوعي
والتحقيق طلعني مدان
التحقيق طبعا تحقيقم أو تحقيق الامريكان
اسبوعين عديتن جوه
اسبوعين زادننا قوة
ست الدار ما تشفقي خالص
ست الدار انا ياني الزين
ست الدار سامعاني كويس ؟
كل الهم ما يشغى الغم بيتنا وراشد والتومات
وكل الناس الحالهم شاهد ست الدار الشوق الواحد
لي حلتنا وليكم ليكم
للاشراق الفي عينكيكم
شوق وسلام
الزين ود حامد
ردي سريع ... باليد ... باليد
في دورين موعود بي شغلة
لمت لمت .. كان ما لمت انا جاييكم وما ندمان
الخطاب الثالث
بعد الحاصل والاتحصل ست الدار بت احمد تكتب
زيني الزين ... أب حالاً زين
جاني جوابك يا المبروك
وسابني اشوف الدنيا كويس
واعرف غلط الصاح مظبوط
سابني أميز ... واقدر أفرز ... وأرجع أميز
فرحانابك يا احزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الايام النجسة المرة
ميتين عامل؟
والله مهازل
والله عمايل
يا اوغاد ... وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجيين يا تعسا الحال
هاكم دي ...
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع باخر بنية
ينتج كيف ؟ شغال بي فونيا ؟
عامل ينتج عشرين حتة
تلحقو منها قيمة اتنين
سته بغطو المنصرفات
سبعة ... تمانية ... تسعة بغطو
أدها تسعة المنصرفات
كل الفايض ... بدخل وين ؟
قولو البفضل بمشي لمين ؟
وبرضو خساير ؟
والله مهازل
يا مضغوط ... خفض ميزك حبة تين
تنك القعدة تلاته خطوط
خفف مرتك توب مضغوط
من التمسحبو كبابي الصين
خفض عمرك يا انبة الفانية
وبي نظارتك واجه ثانية
ثانية عيون الشغاليين
ثانية وبس
والله مهازل
ميتين عامل ؟
ميتين بيت؟
ميتين أسرة بلا راس خيت ؟
ميتين أسرة ملوها جراج
ميتين أسرة حا تولد صاح
وليكم يوم يا اولاد الهرمة
ليه يا الزين بتوصي علي
وانا بت احمد ست الدار
أم اولادك وهم صغار ... ثم اولادك وهم كبار
ويا الزين ود حامد داك
كان متوظف ... ياكا الزين
كان متوقف ... يا الزين
ليش يا الدخري توصي عليا
اسبوعين قضيتن جوه
يبقى غصب ... زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات ... مرتا دغري وغلباوية
آه يا الزين ... لو كنت معاكم ... كنت بقيت النوباوية
ما تهتم يالزين بالحاصل
واصل سعيك ... واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا انسان
نسمة تقولك في الامكان
ابدع واحسن من ما كان
يا تو مطرة سوت شو ... فرقو غيما الامريكان
يا تو رصاص ما عقبو خلاص
يا تو سجن يا الزين ود حامد
يا تو محن تمحى الاحساس
لما يكون في الساس والراس
يا تو وطن يا الزين ود حامد
يا تو زمن دام للانجاس
طه ترابلتو راحو الديش
غزا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شق مسيمعك بالجبخانة
لو المجلس قبل اوراقك ... او في الثانوي لقيت لك خانة
لكن قدرك يا انسان ... بلداً هاص هيصة جبانة
طالو الناس التريانين ... ضلو الله الما ضلانا
اخدو نورة الحاج بالدق
باكر دور ما خش عليها
خاتي اللوم قطع التمرات الفوق راس بيتو
الخلفاء شكوهو ومالقو حق
المحجوب اتلقى اخبارك وقال جاييك في اول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
ينشدو منك في الافراح
وفي الاتراح ... الزين الزين
ما تشغل بالك
بس يا الزين كان درت مشورتي
اصلو كتالك يا هو كتالك
تجي مندلي
الواطة تراها
وبي جاي جاي ... بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك ... الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والاشواق من هنا لا عندك
تلغرافات :
نوري . السوق ... ست الدار بت احمد جابر
المحجوب في قطر اليوم
عفش الزين
النوباوية
الخرطوم ... الخرطوم بحري ... كشك الشعلة ... الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري ... السوق ... المحجوب ود احمد جابر
كتب الزين ... كل الاوراق ... راشد كيف
النوباوية
الخرطوم ... الخرطوم بحري ... كشك الشعلة
النوباوية
انا في السكة وست الدار
راشد ود الزين ود حامد