شفرة..هاشم صديق

الثلاثاء 15 سبتمبر 2009, 6:27 am

العنوان...

ألف..لام..سين

واو... دال...أَلِف

وآخر الكلمة

حرف النون.

أخير الشَفْره

(أمن) السُلْطة ما مضمون

وياما السُلْطة

جو (البوسته)

ليها عيون

تَفْتَح..تقرا وتقفل تكتب

تلقى خطاك ..واداك

لسجون...

الاسم

أَلِف..لام..شين

عين..باء

قف.

ألف..لام ..واو

ألف عين يا.

قف

فجر الصَحْوَة يا مولانا

ولّع وجا

منو الماسم مصير البيت؟

شباب (الجبهة)

ولا اللعنة والخُلفََاَ؟

قف.

تَجَارْب الماضى زاد للجاىْ

أخير نوعى ونقول الراى

صلاح البيت

خطير ومصير

وما كلمات فى حفلة شاى.

قف.

يمين البيت طبخ لعبة

يسار البيت أمل(جبهة)

وشارع الحلة يا مولاى

كِتِل مرات

مِرِض مرات

جروحو جروح مظالم الليلة

غُلْب الفات

قف

(بديل مافيش)

نغم مرفوض

وكت تتوحد الرايات

قف

مدارْس الحلة بقَّت نار

وصاح صوت الشباب للتار

وانت الباقى يا مولاى

تعاين فىجنازْة الجار؟

بدون تصرخ

تقول التار

نقول التار

قف

الف..لام..يا

قاف...ظا

آخر الكلمة

مربوط تا.