نخلة وأبنوسة .. أزهري محمد علي

الإثنين 17 سبتمبر 2012, 4:36 pm

نخــــلـــــة وأبنــــوســـــــة/ أزهري محمد علي

يا زوله..

الصوت الطالع منِّى

بِدِّي مسامعِكْ راسْ الخيط

والشوْفْ البِحسِبْ

حَبّ الرَّمل التِحْتِكْ

بِعْرِفْ رنَّة ضحكِكْ

رقم الهاتف

وشارع البيت

والخوف البِفْضَح صمتي

بِعرفِكْ إنتى

يعلم إنِّي

مانى المالي هُدومي

ومافي الجُبَّهِ

إلاَّ إنتي..

زوله..

وكاكاو الدم الفيكْ

مين السّماكِ سِفاح

مِنْ رِحِم أبنوسه ونخله

مين الورّاك إفراز الشهد

وأدَّاكِ مذَاقْ مِن ريق النحله

كضّابه الغابه القالَت

تَشتِلْ أنْناسَه على الصحرا

كضّابه القلتى حتفصلِّى توب العِيد للَهَلهْ

كضّاب القلتَ ملْحوقه خطاوى المَهَلَه

يا زوله..

مخنوقه الشهقه الفي رئتي اليمنى

محمومه خلايا الدم والزفره

مهمومه شِعاب القفص الصدري

مَمْحوقه حُلول الشفره

مفقود مُفْتاح الباب السرِّى

!تذكَّرْ

وين لاقيتَكْ صدفه؟

قالتلى - حبيبة القلب الأولى

والفرح المُعْلَن مدسوسْ

دسيتْ على رِحم الذاكره النُطفه

فى هذا الزمن السوس

إتْرَفَعَتْ بيناتنا الكُلفه

غنيتِكْ نَخله وأبنوسْ

ومَشيِتكْ متقرّب لعيونِكْ زُلفى

!تذكَّر وين لاقيتك صدفه

!أذْكُرْ كنَّا عناصر شتّى

إكتملتْ بينَاتْنا العِفَه

والصيف الاذِع شتَّا

صَفَق النِيم إتساقَطْ حَتَّ

طَرْفَه لَمَحتِكْ

شِلْتَ النفَسَ

الأبى يتْخَتَّ

يضْحَكْ صَحْوك

نوّر كل مناحي الحِتَّه

وما اتسائلتَ عن اسمِك حَتّى

إتلمينا عليكِ وبَغْتَه

دسّيِنَاك من خَفَر الليل

فسّحناك المليون ميل

صَرّينا تُراب أقدَامِكْ فى مِنْديل

وشَهلنَاكِ هُتاف

ومديحْ

وصهيلْ

وقدمناك قُربان للنيل

وكان من عِنْدكِ بَدَت الصحوه

جيِتك مِنِّكْ

شادِّى خَيال الشوق الصهوه

بَدينا نفلِّى الروح

مِنْ نَزَقَ الشهوه

وإترجّلتَ بفعل النخوه

جلسنا نخمِّس فنجان قهوه

إتشاركنا الزاد والمقْعَد

فَتَحنا ملف الزمن الأبْعَد

قام الفرح الطوّل مُقْعَدْ

لا قيناكْ دلوكه ودبكه

إتسالمنا سلام غُبار السِكّه.

!زوله

وكاكاو الدم الفيك

!مين السمَّاكِ سِفاح