حكايتي مع الغــد

الإثنين 14 سبتمبر 2009, 3:11 pm

من عيون البهجة

من دنيا الصبابة

بغنى عليه شوق الشوق

!!.. وانقرش فى الربابة

بشوف دربن

موكر جوه ..غابة

دريبن

أصلو ما شافوهو

بى عين الزمان

ناس حطابه

البشقو التيه

وراحلين يا جلابه

البكربتو

فوق ضلوع الليل

وقاصدين البعيد

وبعد البعيد

وادى الغلابه

زوامل طاشه

فى جوف الأسى

سافين

فى هدير اللجه

ضاربه

!..ورا..سرابا

لما جيت

لقيت الزاد

!! مفضل فى جرابا

حُروفن

قاعده فوق لوح الزمان

زى الضهن

!!.. تلصف على صفحة ..كتابا

بديت بى فاسى

افتح فى دريبن

شرب لهب الهجير

!!.. مندسى فى أعماقى ترابا

وشارب لهفة الدوبيت

من الوديان

ومن حرفن

!!..يهبهب فى ..الربابه

وجبت الباديه

ترقد فى الجروف

تحت النخيل

!!.. غزلت شبابا

ونوف القدره

من تيه الليالى

بتهدر للهدير

عطشانه

!!.. تحلم بى شرابا

وجو الجوف

بحس

فى جوه جوفى

دليب.."ودرفه"

فوق الريح يشابى

وقلبى معاهو

!!.. شقيش شابا .شابا

وحيحن فى "امدرق"

وكتين يهود

تلاقى الروح

!!..تهود فى عذابا

وبصبح سى غريب

فى الدنيا سابح

بلا جنحين

!!..مسافر فوق سحابه

وأبقى حنين

على الوديان ازغرد

ادوب

فى خُدُرة الجرف المندى

أه د إيديه

لى نخلن يهبهب

بشيش..بشيش

!!.. أكدب فى ..رُقابا

أصفق بالفرح

لمان بالفرح

لمان أشوفن

كلام الطيبة ممزوج فى حديثن

يقولوا..ليه

!!؟. وين وين ..يا خرابا

كليماتن

بتزرع جوفى جنه

تخدر

فى يباب عمرى المحنة

اهلنا مع الزمان

يا هن أهلنا

ودار ام زين

!!.. على الأبعاد..حبابه..ومرحبابه

حلاة العاصى

لمان ينبهل

فى الجوف يولول

سدود اللجّة

!!..تفتح ليك ..بابا

تزغرد

زى حنين الفارده

لمان..

فى الدروب تلمح خيالن

تظنه الشوق

تلاقى الشوق

!!.. يزغرد..يابا..يابا